Gwamnatin Jihar Sakkwato ta rufe wani ofishin kamfen na jam’iyyar ADC, bisa dalilin kare rayuka da dukiyoyi bayan wani rikici da ya faru tsakanin magoya bayan jam’iyyar da wasu ɓata-gari.
Kwamishinan Filaye da Gidaje na jihar, Barista Nasiru Dantsoho, ne ya bayyana hakan ranar Litinin, inda ya ce an rufe ginin ne domin hana sake ɓarkewar rikici.
Dantsoho ya ce bayan nazarin takardun mallakar ginin, gwamnati ta gano cewa asalin mallakarsa na tsohon bankin Savannah Bank ne, kuma babu wata sahihiyar takarda da ke nuna an sauya mallakarsa zuwa wani mutum ko hukuma.
Ya bayyana cewa gwamnati ta rubuta wa Hukumar Inshorar Kuɗaɗen Ajiya ta Nijeriya (NDIC), wadda ya ce ita ce ke kula da kadarorin bankin, domin neman karin bayani kan asalin wanda ke da mallakar ginin, amma har yanzu ba a samu amsa ba.
Kwamishinan ya ce za a ci gaba da rufe ofishin har sai hukumar NDIC ta bayar da amsa, yana mai cewa matakin ya zama dole domin kare rayuka da dukiyoyi da kuma hana sake samun tashin hankali.
