Babbar Kotun Jihar Kano ta yanke wa wasu matasa biyu, Aliyu Adamu da Mubarak Abdussalam, hukuncin kisa ta hanyar rataya bisa samunsu da laifin kisan kai, yayin da ta yanke wa mutum na uku, Sadik Sanusi, hukuncin zaman gidan yari na shekaru bakwai.
Gwamnatin Jihar Kano ce ta gurfanar da mutanen uku bisa zargin haɗa baki wajen aikata laifi, kisan kai da kuma ɓoye laifi.
Da take yanke hukunci, Mai Shari’a Fatima Adamu ta Kotun mai lamba 18 da ke Miller Road, ta ce masu gabatar da ƙara, ƙarƙashin jagorancin Lauya Salisu Muhammad Tahir, sun gabatar da isassun hujjoji da suka tabbatar da tuhume-tuhumen da ake yi wa waɗanda ake ƙara.
Kotun ta samu Aliyu Adamu da Mubarak Abdussalam da laifin kashe Alhaji Dahiru, mazaunin Yankusa, ta hanyar soka masa wuƙa.
Haka kuma, kotun ta same su da laifin haɗa baki da Sadik Sanusi, wanda ake zargin ya yi amfani da babur mai kafa uku na kasuwancinsa wajen kai su wurin da suka aikata laifin, inda daga bisani suka ƙona gawar mamacin.
Masu gabatar da ƙara sun bayyana cewa waɗanda ake tuhuma sun aikata laifin ne da nufin ƙwace takardun mallakar filin mamacin.
