Hukumar Kare Haƙƙin Masu Amfani da Kayayyaki ta Jihar Kano (KCPC), tare da haɗin gwiwar shugabancin Kasuwar Singa, ta kama wasu ’yan kasuwa bisa zargin ƙoƙarin sauya ranar ƙarewar amfanin wata madarar gari da wa’adin amfani da ita ya riga ya ƙare.
Hukumar ta kuma rufe shagunan da ake zargin suna da hannu a wannan aika-aika.
A cikin wata sanarwa da Daraktan Wayar da Kan Al’umma na hukumar, Jamilu Mustapha Yakasai, ya sanya wa hannu, ya ce an gudanar da aikin ne bayan samun kiran gaggawa daga Mataimakin Shugaban Ƙungiyar ’Yan Kasuwa, Aminu Umar Dogara.
Daraktan Kula da ’Yan Kasuwa da Kayayyaki na hukumar, Auwalu A. Muhammad, ya ce kiran ya ankarar da hukumar game da zargin wannan badakala da ake yi a cikin kasuwar.
Ya bayyana cewa nan take aka tura jami’an hukumar zuwa wurin domin gudanar da bincike, wanda ya kai ga kama waɗanda ake zargi da kuma rufe shagunan da abin ya shafa.
Muhammad ya ce hukumar ta ƙuduri aniyar kare masu sayayya daga kayayyakin da wa’adin amfani da su ya ƙare, da kuma waɗanda aka sauya bayanansu, yanayinsu ko ingancinsu ta hanyar da ta saɓa wa doka.
