Rundunar ’Yansandan Jihar Gombe ta kama wani mutum mai shekaru 29, mai suna Ahijo Boyi, bisa zargin lalata manyan layukan lantarki da satar wayoyinsu.
Rundunar ta kuma kwato naɗe-naɗen wayoyin lantarki guda huɗu da ake zargin an sace ne daga hannun wanda ake zargin.
Jami’in hulɗa da jama’a na rundunar, DSP Buhari Abdullahi, ne ya bayyana hakan cikin wata sanarwa da ya fitar ranar Litinin a Gombe.
Ya ce an kama Boyi, mazaunin unguwar Burundi da ke ƙaramar hukumar Akko, ne da misalin ƙarfe 9 na safe ranar 31 ga Oktoba, 2026, yayin sintirin jami’an ’yansanda tare da taimakon wasu mazauna yankin.
Binciken farko ya nuna cewa an lalata layin wutar lantarkin ne daga yankin rundunar sojin 301 Army Artillery Regiment zuwa yankin Gona da ke cikin Jihar Gombe.
Rundunar ta ce tana ci gaba da gudanar da bincike domin gano cikakken bayani kan lamarin.
