Shugaban Ƙasa Bola Ahmed Tinubu ya bayyana zama shugaban Nijeriya a matsayin wata babbar ni’ima da Allah ya yi masa, yana mai cewa zai yi amfani da damar wajen yi wa ƙasa hidima da samar da ci gaba da wadata.
Tinubu ya bayyana hakan ne yayin da yake tsokaci kan ziyarar ibadar Umrah da ya kai ƙasar Saudiyya, inda ya samu damar shiga cikin Ƙa’aba mai alfarma a Makka tare da jagorantar tawagar Nijeriya wajen yin addu’a.
A cewar sanarwar da mai ba shi shawara kan harkokin yaɗa labarai da dabaru, Bayo Onanuga, ya fitar, shugaban ƙasar ya ce ya roƙi Allah ya ba shi hikima da juriyar ci gaba da yi wa ’yan Nijeriya hidima.
Ya kuma bayyana cewa ikon mulki amana ne daga Allah, don haka wajibi ne shugabanni su yi amfani da shi cikin tawali’u da adalci wajen yi wa al’umma hidima.
Tinubu ya ce yana da yakinin cewa tattalin arzikin Nijeriya ya fara fita daga mawuyacin halin da ya shiga, yana mai cewa ginshiƙin tattalin arzikin ƙasar ya samu ƙarfi.
Ya jaddada cewa gwamnatinsa za ta ci gaba da mayar da hankali wajen samar da makoma mai kyau ga matasa ta hanyar zuba jari a ci gabansu.
Shugaban ya kuma gode wa Sarkin Saudiyya, Salman bin Abdulaziz Al Saud, da Yarima mai jiran gado, Mohammed bin Salman, bisa damar da suka ba shi da tawagarsa ta shiga cikin Ƙa’aba domin gudanar da addu’o’i.
Ya bayyana damar a matsayin wata muhimmiyar kyauta ta tarihi da ba zai manta da ita ba, wadda kuma ke nuna kyakkyawar alakar Najeriya da Saudiyya.
