Fiye da shekaru 20 na hidimar jama’a da Sanata Abdul’Aziz Abubakar Yari ya yi, wanɗanda suka haɗa da shugabanci a matakin tarayya, jiha da kuma majalisa, sun bambanta shi a matsayin fitaccen ɗan siyasa mai matuƙar tasiri. Ƙwarewarsa a harkokin siyasar jam’iyya,
basirarsa wajen tsira a fagen siyasa, jajircewarsa, ƙwarewarsa wajen samar da fahimtar juna tsakanin masu ruwa da tsaki da kuma iya sauya salon siyasarsa domin dacewa da yanayi, sun sa ya cancanci zama Gwarzon Ɗan Siyasar Shekarar 2026.
An haifi Yari a ranar 28 ga Janairu, 1968, a Talata Mafara, Jihar Zamfara. Ya fara harkar siyasa ne a shekarar 1999 a matsayin Sakataren jam’iyyar ANPP a Jihar Zamfara. Daga baya ya zama Shugaban ANPP na Jihar Zamfara, sannan daga baya ya zama Sakataren Kuɗi na Ƙasa na jam’iyyar. A shekarar 2007, an zaɓe shi zuwa Majalisar Wakilai, inda ya wakilci mazaɓar tarayya ta Anka/Talata Mafara.Yari, gogaggen ɗan siyasa, ya matsa zuwa ɓangaren zartarwa a shekarar 2011, lokacin da aka zaɓe shi Gwamnan Jihar Zamfara a ƙarƙashin tutar ANPP. An sake zaɓensa a shekarar 2015 a ƙarƙashin jam’iyyar APC, inda ya riƙe matsayin gwamna daga 2011 zuwa 2019. A wa’adinsa na biyu, takwarorinsa gwamnonin Nijeriya sun zaɓe shi a matsayin Shugaban Ƙungiyar Gwamnonin Nijeriya (Nigeria Goɓernors’ Forum) a watan Mayun 2015, matsayin da ya riƙe har zuwa shekarar 2019.Komawarsa Majalisar Ƙasa ta ƙara ƙarfafa matsayinsa a matsayin ɗaya daga cikin manyan jiga-jigan siyasa. A halin yanzu, Yari yana matsayin Sanatan da ke wakiltar Mazaɓar Sanatan Zamfara ta Yamma a Majalisar Dattawa ta 10, a ƙarƙashin jam’iyyar APC.
Tun da nasararsa ba ta zo kwatsam ba, Sanata Yari ya ci gaba da taka rawa a Majalisar Dattawa kan batutuwan da suka shafi muhimmancin ƙasa, ciki har da matsalar rashin tsaro, ababen more rayuwa da albarkatun ruwa. Daga cikin muhimman matakan da ya ɗauka akwai jan hankalin Majalisar Dattawa kan yadda matsalar tsaro ke ƙara ta’azzara a Zamfara, da kuma neman majalisa ta mayar da hankali kan hare-haren da ake kai wa al’ummomi da asarar rayuka.
Babu shakka, shekarar 2026 ta kasance wani muhimmin mataki a tarihin siyasar Yari, musamman ganin yadda tasirinsa a cikin jam’iyyar APC mai mulki ya ƙara bayyana yayin da jam’iyyar ke shirin tunkarar babban zaɓen shekarar 2027.A ranar 22 ga Agusta, 2026, Shugaba Bola Ahmed Tinubu ya kafa Kwamitin Yaƙin Neman Zaɓen Shugaban Ƙasa na APC, wato kwamitin sake zaɓe na shekarar 2027, sannan ya naɗa Sanata Abdul’aziz Yari a matsayin Darakta-Janar. Wannan naɗin ya sanya shi a tsakiyar tsarin yaƙin neman zaɓen jam’iyyar mai mulki a matakin ƙasa.
Shugaba Tinubu da kansa ne ke matsayin Shugaban kwamitin, yayin da Mataimakin Shugaban Ƙasa Kashim Shettima ke matsayin mataimakin shugaban kwamitin, sannan Gwamnan Jihar Imo, Hope Uzodimma, yake matsayin Sakatare.A cikin da’irar siyasa, abu ne sananne cewa wannan naɗi ba wai kawai ya nuna gagarumin amincewa da ƙwarewar Yari wajen tsara harkoki da siyasarsa ba ne, har ma da jajircewarsa da dagewarsa. A matsayinsa na Darakta-Janar na Kwamitin Yaƙin Neman Zaɓen Shugaban Ƙasa na APC, an ɗora wa Yari alhakin daidaita wani muhimmin ɓangare na ƙoƙarin jam’iyyar na ganin an sake zaɓen Shugaba Tinubu a zaɓen shugaban ƙasa na shekarar 2027.
Naɗin nasa ya kuma nuna yadda rawar da yake takawa wajen tattara magoya baya da tsara dabarun siyasa na jam’iyyar mai mulki ke ƙara bunƙasa gabanin wani zaɓe mai matuƙar muhimmanci a ƙasa.Baya ga naɗe-naɗen siyasa na hukuma, Yari, wanda aboki ne ga masu rauni da marasa galihu, ya ci gaba da kasancewa mai tasiri a Zamfara ta hanyar ayyukan jin ƙai. A watan Agustan 2026, shirinsa na tallafin jin ƙai ya sanar da rabon motocin dakon masara guda 145 da kuma buhunan Semoɓita guda 42,000, kowanne mai nauyin kilogram 10, ga waɗanda suka rasa muhallansu da iyalai masu rauni a faɗin jihar. Shirin ya yi niyyar tallafa wa mutum 210,000 a cikin mazaɓu 147 na siyasa da ke Zamfara.Rabawar na daga cikin wani babban shirin tallafi da kwamitin ya bayyana cewa ya amfanar da sama da mazauna miliyan 1.7 cikin shekaru uku, ta hanyar kayan abinci, kayan aikin noma da sauran kayayyakin agaji.Baya ga siyasar jam’iyya ta al’ada, Yari ya kuma faɗaɗa tasirinsa zuwa fannin shugabancin kamfanoni. A watan Disambar 2025, an naɗa shi Shugaban Hukumar Daraktocin Geregu Power Plc, matsayin da ya riƙe a shekarar 2026. Wata sanarwa da kamfanin ya fitar a watan Janairun 2026 zuwa Nigerian Exchange ta tabbatar da cewa shi ne shugaban hukumar kamfanin.A bisa bayanan da aka samu, rawar jagorancinsa a Geregu Power ta haifar da sakamako mai kyau, domin a ranar 16 ga Agusta, 2026, kamfanin ya kammala biyan bashin Naira biliyan 6.03 da yake bi na jinginar kuɗi. Wannan nasara ta zama wata hujja da ta tabbatar da ƙwarewar Yari wajen jagoranci a fannin gudanar da manyan kamfanoni, baya ga nauyin da yake ɗauke da shi a harkokin siyasa.
Za mu iya cewa cikin aminci cewa Sanata Abdul’aziz Abubakar Yari cike yake da kuzarin siyasa, wanda ya bayyana a fagen siyasar ƙasar nan. Tarihinsa ya nuna tafiyar siyasa da ta samo asali daga tsara harkokin jam’iyya a matakin ƙasa, zuwa Majalisar Wakilai, shugabancin Jihar Zamfara, jagorancin Ƙungiyar Gwamnonin Nijeriya, har zuwa zama ɗan Majalisar Dattawan Nijeriya.
A shekarar 2026, naɗinsa a matsayin Darakta-Janar na Kwamitin Yaƙin Neman Zaɓen Shugaban Ƙasa na APC na zaɓen shekarar 2027 ya zama ɗaya daga cikin fitattun alamomin irin babban nauyin siyasa na ƙasa da jam’iyyar mai mulki ta ɗora masa.Saboda haka, karrama shi da lambar yabo ta Gwarzon Ɗan Siyasar Shekarar 2026 ta samo asali ne daga ɗorewar shigarsa cikin harkokin gwamnati da siyasar Nijeriya, da kuma ƙwarewar da ya samu a matakai daban-daban na gwamnati.
Ya ku manyan baƙi maza da mata, saboda ɗimbin ƙwarewarsa a harkokin siyasa, ci gaba da kasancewarsa mai taka rawa a harkokin jama’a, jagorancinsa wajen tattara magoya baya da tsara harkokin siyasa a matakin ƙasa, wakilcin al’ummarsa, da kuma babban nauyin da aka ɗora masa a tsarin zaɓen Nijeriya na shekarar 2027, ana karrama Sanata Abdul’aziz Abubakar Yari a matsayin wanda ya lashe lambar yabo ta Gwarzon Ɗan Siyasar Shekarar 2026.
