Ma’aikatar cinikayya ta kasar Sin, ta ce hada-hadar sayayya ta gudana bisa daidaito yayin bikin gargajiya na Dragon Boat na kasar Sin da aka kammala a jiya Lahadi. Ma’aikatar ta ce an samu daidaiton samarwa, da na farashin kayayyakin bukatun yau da kullum yayin shagulgulan bikin.
Yayin kwanaki uku na hutun bikin, ma’aikatar ta ce adadin zirga-zirga a kafa da ribar cinikayya a wasu muhimman titunan kasuwanci, da sassan hada-hadar cinikayya 78 da aka tantance, sun karu da kaso hudu da kuma kaso 3.5 bisa dari a mizanin shekara-shekara.
Ya zuwa ranar Asabar, adadin masu sayayya da suka gudanar da cinikayya ta musayar tsofaffin hajoji da sababbi a kasar ta Sin ya kai miliyan 136, wanda hakan ya haifar da cinikayyar sama da yuan tiriliyan daya kwatankwacin dalar Amurka biliyan 146.78.
Bikin Dragon Boat wanda kuma a kan kira da bikin Duanwu, a bana ya fado a ranar Juma’a, an kuma gudanar da hutunsa tsakanin ranakun Juma’a zuwa jiya Lahadi. (Saminu Alhassan)
