Mai Alfarma Sarkin Musulmi Muhammadu Sa’ad Abubakar da Gwamna Aminu Waziri Tambuwal na Jihar Sakkwato sun yi kira ga mahajjatan Nijeriya na bana da su yi addu’o’in ganin an samu shugabanni na gari a zaben 2023 mai zuwa.
Sun yi wannan kiran ne a filin tashi da saukar jiragen sama na Sultan Abubakar, dake Sakkwato, yayin da suke kaddamar da jirgin farko mai jigilar maniyyata 420 daga jihar zuwa kasa mai tsarki, Makkah Kasar Saudiyya.
Sarkin ya bukaci maniyyatan da su yi addu’ar Allah ya kawo mana dauki cikin kwanciyar hankali a kasar nan, ya kuma bukace su da suyi addu’ar Allah ya ba mu shugabanni nagari a kowane mataki na mulki.
Gwamnan a nasa jawabin ya hori maniyyatan da su yi addu’ar zaman lafiya, hadin kai da kuma ci gaba a jihar da kasa baki daya.
