Hauhawar farashin kayayyaki a Nijeriya ya ƙaru zuwa kashi 15.93 cikin 100 a watan Mayun 2026, a cewar sabon rahoton Hukumar Kididdiga ta Ƙasa (NBS).
Adadin ya tashi daga kashi 15.69 a watan Afrilu, wanda ya ƙaru sauk uku a jere a bana.
Duk da haka, adadin ya yi ƙasa sosai idan aka kwatanta da kashi 26.06 cikin 100 da aka samu a watan Mayun 2025.
NBS ta ce ma’aunin farashin kayayyaki da ayyuka ya tashi daga 138.3 a watan Afrilu zuwa 140.7 a watan Mayu, wanda ke nuna cewa farashin kayayyaki da ayyuka na ci gaba da ƙaruwa.
A ma’aunin wata-wata kuwa, hauhawar farashin ya ragu zuwa kashi 1.75 cikin 100 a watan Mayu, daga kashi 2.13 cikin 100 a watan Afrilu.
Farashin kayan abinci ne suka ci gaba da kasancewa babban abin da ke haddasa hauhawar farashin.
Hauhawar farashin abinci ta kai kashi 16.96 cikin 100, sakamakon ƙarin farashin kayan masarufi kamar albasa, masara, tumatir, doya, kayan rogo, barkono da wake.
Hauhawar farashin kayayyaki da ayyuka ba tare da abinci da makamashi ba ya kai kashi 16.82 cikin 100, yayin da hauhawar farashin ayyuka ya kai kashi 17.92 cikin 100.
Daga cikin jihohi, Yobe ce ta fi kowacce jiha fuskantar hauhawar farashi da kashi 24.94 cikin 100, sai Anambra da Sakkwato.
Ita kuwa Neja ta samu mafi ƙarancin hauhawar farashi da kashi 3.07 cikin 100.
Rahoton ya nuna cewa duk da raguwar hauhawar farashi idan aka kwatanta da bara, har yanzu ‘yan Nijeriya na ci gaba da fuskantar tsadar rayuwa, musamman a ɓangaren kayan abinci, sufuri da sauran muhimman kayayyaki da ayyuka.
