Xie Feng, jakadan kasar Sin a kasar Amurka, ya ce ya kamata kasashen Sin da Amurka su yi amfani da matakan cudanyar al’adu wajen raya wata hulda mai dacewa tsakanin bangarorin biyu.
Mista Xie ya fadi haka ne a lokacin da yake halartar wani bikin kide-kide da ofishin yawon shakatawa na kasar Sin dake birnin New York na kasar Amurka, da kungiyar wasan kide-kide ta birnin Philadelphia na kasar Amurka, suka gabatar a hadin gwiwarsu, wanda shi ma ya kasance wani biki na tallatar shahararrun wuraren yawon shakatawa na kasar Sin, da ya gudana a birnin Philadelphia a ranar Laraba.
A cewar jami’in, yanzu haka kasashen Sin da Amurka suna kokarin neman hanya mai dacewa wajen kyautata hulda a tsakaninsu, wanda ya kasance wani aiki mai sarkakiya. Saboda haka, ya kamata a karfafa cudanyar al’adu, a kokarin samar da damammakin yaukaka hulda tsakanin kasashen 2.
Ta hanyar cudanya tsakanin al’ummun Sin da Amurka, za a karfafa dankon zumunci, da inganta hadin gwiwa mai amfanin juna, da koyon fasahohi na juna a kokarin tabbatar da kyakkyawar makomar dukkan bangarorin 2, in ji jami’in na kasar Sin. (Bello Wang)
