Ƙungiyar ƙwallon ƙafa ta Kano Pillars ta samu gagarumar nasara bayan ta doke Doma United da ci 4-1 a wasan mako na huɗu na gasar Euro Match NPFL ta 2026/2027, wanda aka buga a filin wasa na Sani Abacha da ke Kofar Mata, Kano, ranar Lahadi, 20 ga Satumba. Abdullahi Musa, Rabiu Ali, Ahmed Musa da Nasiru Salihu ne suka zura ƙwallayen da suka bai wa Sai Masu Gida nasarar.
Kano Pillars ta fara cin ƙwallo ne a minti na 19 ta hannun mai tsaron baya Abdullahi Musa, kafin kyaftin ɗin ƙungiyar, Rabiu Ali, ya ƙara ta biyu a minti na 32. Da wannan sakamakon ne Pillars ta shiga hutun rabin lokaci tana kan gaba da ci 2-0.
Bayan dawowa daga hutun rabin lokaci, Doma United ta rage tazarar ƙwallayen ta hannun Sadiq Rilwan. Sai dai Ahmed Musa ya ƙara wa Kano Pillars ƙwallo ta uku a minti na 77, kafin Nasiru Salihu ya zura ta huɗu a ƙarshen wasan, wanda ya tabbatar da maki ukun ga masu masaukin baƙi.
Wannan ne karon farko da Doma United ta sha kashi a kakar wasan bana, bayan ta yi nasara a wasanninta uku na farko, lamarin da ya ba ta damar zama a saman teburin gasar da maki tara. Nasarar ta kai Kano Pillars matsayi na uku da maki bakwai daga wasanni huɗu da ta buga.
A mako na biyar, Kano Pillars za ta ziyarci Inter Lagos ranar 23 ga Satumba, yayin da Doma United za ta karɓi baƙuncin Plateau United a filin wasa na Pantami dake Gombe, ranar 27 ga Satumba, 2026.
