A yau Lahadi, kasar Sin ta aike da taurarin dan’adam guda tara zuwa sararin samaniya ta hanyar amfani da rokar Kinetica-1 Y-18, wadda aka harba daga yankin gwaji na kirkire-kirkiren kimiyyar sararin samaniya na kasuwanci na Dongfeng da ke arewa maso yammacin kasar.
Daga cikinsu, tauraron dan’adam samfurin PEGA-SUS1 ya fi jan hankali sosai a matsayin na’urar gwajin fasaha da aka kera da nufin inganta tsarin da ya kunshi ayyukan sadarwa, da gano bayanai, da aiki da basirar na’ura, da kuma sarrafa bayanai.
An kera PEGA-SUS1 ne ta hanyar hadin gwiwa a tsakanin kamfanin GalaxySpace, da dakin bincike da gwaje-gwaje na Pengcheng, da jami’ar kimiyya da fasaha ta kudancin kasar Sin da kuma sauran abokan hadin gwiwa.
A cewar GalaxySpace, wannan aiki zai yi bincike a kan manufar tsarin “tauraron dan’adam guda mai ayyuka da yawa,” kuma ana sa ran zai tallafa wajen gudanar da karin gwaje-gwajen sabbin fasahohin zamani na gaba da za su hade sadarwa tsakanin sararin samaniya da doron kasa. (Abdulrazaq Yahuza Jere)
