Kasar Sin ta hada cibiyar adana makamashin carbon dioxide da aka matse, mai karfin megawatt 100 irinsa na farko da tashar rarraba lantarki a jiya Juma’a, lamarin da ya zama gagarumar nasara ga fasahar adana makamashi mai tsafta a babban mataki.
A kowace shekara cibiyar wadda ke gundumar Mori Kazakh mai cin gashin kanta a jihar Xinjiang da ke arewa maso yammacin kasar Sin, za ta iya adana lantarki sa’ar kilowatt miliyan 290 a lokacin da ake da karancin bukatar lantarki, sannan ta bayar da lantarki mai tsafta na sa’ar kilowatt miliyan 180 a lokaci mafi bukata. Fasahar na aiki ne a matsayin wata katafariyar batir, wadda ke da ma’ajiyar gas 5, da wuraren adana ruwa 141 da na adana zafi guda 97.
Tana matse gas din carbon dioxide zuwa ruwa a lokacin da bukatar lantarki ba ta da yawa domin adana makamashi, sannan kuma ta fadada zuwa gas domin kunna na’urorin samar da lantarki a lokacin da aka fi bukatarsa.
An tsara aikin ne ta yadda zai daidaita aikin tashar raba lantarki a yankin, ta hanyar zuke rarar lantarki a lokacin da ba a bukatarsa sosai, da kuma sakinsa a lokacin da aka fi bukatar lantarkin, lamarin da ke taimakawa wajen kara shigar da makamashi mai tsafta cikin tsarin raba lantarki na yankin.(Fa’iza Mustapha)
