Kano Pillars, wato Masu Gida, za su kara da Doma United a filin wasa na Sani Abacha Stadium ranar Lahadi, a wasan da ake sa ran za su yi ƙoƙarin dakatar da kyakkyawan farkon kakar 2026/27 da ƙungiyar ta yi.
Doma United, wadda ta dawo gasar, ce ke jagorantar teburin da maki tara bayan wasanni uku, bayan ta ci kwallaye biyar ba tare da an zura mata ko guda ɗaya ba.
Ƙungiyar ta buɗe kakar da nasara 2-0 kan Sporting Lagos, ta doke Inter Lagos 1-0, sannan ta samu gagarumar nasara 2-0 kan tsohuwar zakara, Enyimba.
A gefe guda, Kano Pillars tana matsayi na bakwai da maki huɗu daga wasanni biyu. Ta tashi 2-2 da Kwara United kafin ta doke Neja Tornadoes 3-2.
Masu Gida za su yi fatan yin nasara a wasan domin karya kariyar Doma United, yayin da ƙungiyar ta Gombe ke neman ci gaba da riƙe kambin rashin zuba mata ƙwallo a kakar bana.
Nasara ga Kano Pillars za ta taimaka mata wajen rage tazarar maki da ke tsakaninta da jagorar teburin, yayin da nasarar Doma United za ta ƙara tabbatar da kyakkyawan fara kakar da ƙungiyar ta yi.
