Shugaban Amurka Donald Trump ya hana ’yan jaridar CNN, MS NOW da Politico shiga Fadar White House domin gudanar da aikinsu.
Trump ya sanar da matakin ne a ranar Juma’a, inda ya zargi kafafen da yaɗa abin da ya kira “labaran ƙarya” game da shi da gwamnatinsa.
Ya kuma yi barazanar cewa wasu kafafen yaɗa labarai na iya fuskantar irin wannan mataki.
A ranar Asabar, jami’an tsaron Fadar White House sun hana wasu ’yan jaridar kafafen uku shiga, tare da ƙwace ko kashe katunan izinin shiga nasu.
CNN ta ce matakin ya saɓa wa kundin tsarin mulkin Amurka, inda ta bayyana cewa tana da ’yancin gudanar da aikin jarida ba tare da tsangwama daga gwamnati ba.
MS NOW da Politico su ma sun ce za su kare haƙƙinsu na aikin jarida.
Ƙungiyar ’yan jaridun da ke rufe ayyukan Fadar White House ta kuma soki matakin, tana mai cewa bai kamata a hana ’yan jarida damar shiga bisa abubuwan da suka ruwaito ba.
Wannan ba shi ne karon farko da Trump ke taƙaddama da kafafen yaɗa labarai ba.
A baya ma ya taɓa ƙoƙarin hana wasu ’yan jarida ko kafafen yaɗa labarai shiga wasu ayyukan Fadar White House, ciki har da CNN.
