Kotun Tarayya da ke Jihar Gombe ta umarci jam’iyyar PDP da ta sake gudanar da zaɓen fitar da gwani na takarar gwamnan jihar, bayan soke tikitin takarar da aka bai wa Farfesa Isa Ali Pantami na zaɓen 2027.
Mai shari’a Amina Aliyu Mohammed ce ta bayar da umarnin a ranar Alhamis, 24 ga Satumba, 2026, yayin yanke hukunci kan ƙarar da Usman Aliyu Garry ya shigar, inda ya ƙalubalanci fitowar Pantami a matsayin ɗan takarar gwamnan jihar na PDP.
Garry ya shigar da ƙarar ne bayan da PDP ta sanar da Pantami a matsayin ɗan takararta tilo a ranar 26 ga Yuni, 2026. Ya bayar da hujjar cewa jam’iyyar ta gaza gudanar da zaɓen fitar da gwani na gwamna kamar yadda doka ta tanada kafin sanar da Pantami a matsayin ɗan takararta.
Pantami, wanda a baya ya nemi takarar gwamna a jam’iyyar APC, ya koma PDP ne bayan APC ta amince da Jamilu Gwamna a matsayin ɗan takararta na maslaha. Daga bisani, Pantami ya samu tikitin PDP ta hanyar amincewa da murya a zaɓen fitar da gwani da jam’iyyar ta gudanar a watan Mayu.
A hukuncin nata, Mai shari’a Amina ta umarci PDP da ta gudanar da sabon zaɓen fitar da gwani bisa ƙa’idojin jam’iyyar da dokokin zaɓe da suka dace. Hukuncin ya soke fitowar Pantami a matsayin ɗan takarar gwamnan PDP, yayin da ake jiran sabon zaɓen fitar da gwani.
