Kwamitin Yaƙin Neman Zaɓen Shugaban Ƙasa na Jam’iyyar APC (APC-PCC) ƙarƙashin jagorancin Darakta Janar na kamfen ɗin, Sanata Abdulaziz Yari, zai gudanar da taronsa na farko na share fage a birnin Abuja a ranar Talata, 20 ga watan Oktoba, 2026.
Wannan taro na da nufin tsara dabarun aiki da kuma kammala dukkan shirye-shiryen taron ƙaddamar da yaƙin neman zaɓen shugaban ƙasa na babban zaɓen 2027 da za a yi a birnin Kaduna a ranar Asabar, 24 ga watan Oktoba.
A yayin taron na ranar Talata, ana sa ran kwamitin zai raba wa shugabannin sassan kamfen ɗin ayyukan da za su gudanar tare da tsara jadawalin yadda za a zagaya shiyyoyi daban-daban na ƙasar.
Babban abin da za a fi mayar da hankali a kai shi ne tsara yadda manyan jiga-jigan jam’iyyar za su wakilci Shugaba Bola Ahmed Tinubu a tarukan gangami a jihohi sama da 20 da ba zai samu damar halarta da kansa ba, domin ba shi damar ci gaba da kula da harkokin gudanar da mulkin ƙasa a Abuja.
Kwamitin zai kuma tattauna hanyoyin tallata nasarorin da gwamnatin Tinubu ta samu a shekaru uku da rabi da suka gabata, musamman sauye-sauyen tattalin arziƙin da suka fara haifar da sauƙin hauhawar farashin kaya zuwa kashi 14.63 cikin ɗari a watan Satumba, da kuma ayyukan more rayuwa.
Haka kuma, taron zai fayyace dabarun mayar da martani ga kalaman jam’iyyun adawa irin su ADC da NDC, tare da sake jaddada aniyar jam’iyya mai mulki na gudanar da tsaftataccen kamfen na wayewar kai ba tare da amfani da kalamai masu zafi ko tayar da zaune-tsaye ba.
Wannan ganawa ta ranar Talata za ta zama tubalin fara ayyukan kamfen ɗin jam’iyyar gadan-gadan a faɗin ƙasar, inda ake sa ran gwamnonin jam’iyyar, ministoci, da ƴan majalisun tarayya za su halarta domin haɗa ƙarfi da ƙarfe.
Shugabannin APC sun nuna ƙwarin gwuiwar cewa taron na Kaduna zai nuna irin ɗimbin goyon bayan da jam’iyyar ke da shi a Arewa da Kudancin ƙasar, a daidai lokacin da take neman sabon wa’adin shekaru huɗu domin ciyar da Nijeriya gaba.
