Ofisoshin babban shalƙwatar Hukumar Gudanar da Birnin Tarayya (FCTA) da Hukumar Raya Birnin Tarayya (FCDA) sun kasance babu kowa a kulle a safiyar Litinin, yayin da ma’aikata suka amsa kiran yajin aiki na har sai bana ta gani da Kwamitin Hadin Gwuiwar Kungiyoyin Ma’aikata (JUAC) suka bayar kan buƙatar inganta yanayin aiki.
Da misalin ƙarfe 8:00 na safe, an kulle manyan kofofin shalƙwatar, inda ma’aikata da masu ziyara suka kasa shiga. Wannan mataki ya biyo bayan wata sanarwa da JUAC ta fitar a daren Lahadi mai taken “Code Remain at Home”, wadda ta umarci cikakken biyayya ga yajin aikin.
Sanarwar ta ce: “Dukkan ma’aikata an shawarce su da su zauna a gida yayin da JUAC ta fara yajin aiki. Kada ku zo wurin aiki saboda jami’an JUAC za su kasance a wurin don tabbatar da bin wannan umarni. Aluta Continua! Victoria Acerta! Yaki yana ci gaba, nasara tabbatacciya ce!”
Wani jami’in JUAC da ya yi magana bisa sharaɗin ɓoye sunansa ya bayyana yajin aikin a matsayin matakin ƙarshe. Ya ce: “An matse mu sosai. Ƙorafinmu na neman ingantaccen yanayin aiki a FCTA ba a kula da shi ba tsawon lokaci. Ya isa! Za mu ci gaba da zama a gida har sai an magance koke-kokenmu.”
Ziyara zuwa hedikwatar ta tabbatar da dakatar da dukkan ayyuka, yayin da jami’an kungiya ke sintiri a kofofi kuma babu wani aiki na gudanarwa a ciki. Duk da cewa cikakken bayanin bukatun ma’aikatan bai fito fili ba tukuna, majiyoyin kungiyar sun ce sun shafi batutuwan walwalar ma’aikata, yanayin aiki, da kuma aiwatar da hakkokin da aka dade an amince da su.
A halin yanzu, shugabannin FCTA da FCDA ba su fitar da wani bayani kan yajin aikin ba, lamarin da ya kara jefa mazauna birnin cikin damuwa. Wannan yajin aiki ya janyo babban tashin hankali a harkokin gudanarwa da ayyuka a Birnin Tarayya, inda babu wani alamar lokacin da za a fara tattaunawa don warware matsalar.
