Ma’aikatar kasuwanci ta kasar Sin ta fitar da takarda mai taken “Matsayin Sin kan abin da ake kira da ‘samar da kayayyaki fiye da kima’”, inda aka yi karin haske kan hakikanin al’amura, tare da bayyana manufofi da matsayin kasar kan lamarin na wai “samar da kayayyaki fiye da kima” da ma batutuwan da suka danganci hakan.
Takardar ta yi nuni da cewa, a ko da yaushe Sin tana da tabbatacciyar manufa cewa, ya kamata a rika amfani da ra’ayi bisa gaskiya da adalci wajen duba batun “samar da kayayyakin masana’antu fiye da kima”, kuma a yi la’akari da shi ta fuskar tarihi, har ma ta hanyar nazari mai zurfi, tare da tsayawa kan manufar bude kofa da hadin gwiwa, da samun moriyar juna, kana da kawar da sabani da bambancin ra’ayi gaba daya.
Takardar ta ci gaba da bayyana cewa, yin amfani da manufar kariyar cinikayya ba zai haifar da komai ba sai dai tarwatsa tsarin cinikayya da tattalin arzikin duniya.
Hakan ba zai taimaka wa tabbatar da zaman karko da kwanciyar hankali na tsarin samar da kayayyaki ta duniya ba, ko kuma ci gaban hadin gwiwar masana’antu yadda ya kamata ba, har ma zai haifar da babban hatsari na dogon lokaci ga bunkasar tattalin arzikin duniya. (Bilkisu Xin)
