Majalisar Ƙasa za ta fassara dokokin Nijeriya zuwa Hausa, Yarbanci, Ibo da sauran harsunan ƙasa domin sauƙaƙa wa ’yan Nijeriya fahimtar dokokin da suka shafi rayuwarsu.
Babban Sakataren Asusun Amintattu na Majalisar Ƙasa, Henry Nwawuba, ne ya bayyana hakan ranar Litinin a Abuja.
Nwawuba ya ce Majalisar na kuma haɓaka ɗakin karatu ta hanyar zamanantar da shi zuwa intanet, manhajar wayar hannu da kuma tsarin bin diddigin ƙudurorin doka domin bai wa ’yan majalisa, masu bincike da jama’a damar samun bayanan majalisa cikin sauƙi.
Ya ce ɗakin karatun zai kuma samar da bidiyo hotuna masu bayani da sauran kayan aiki da za su taimaka wajen bayyana ƙudurori, dokoki da yadda tsarin majalisa ke aiki cikin sauƙin fahimta.
Nwawuba ya ce fassara dokoki zuwa harsunan ƙasa zai taimaka wa ƙarin ’yan Nijeriya wajen fahimtar dokokin da suka shafi rayuwarsu ta yau da kullum.
Majalisar na kuma ɗaukar matakan kare bayanan majalisa na zamani daga sauya su ba bisa ƙa’ida ba da kutsen yanar gizo, tare da tabbatar da cewa takardun hukuma sahihai ne kuma ana iya samun su cikin sauƙi.
Shugaban Majalisar Dattawa, Godswill Akpabio, da sauran shugabannin majalisa sun yi kira ga ’yan majalisa da jama’a da su ƙara amfani da ɗakin karatun, musamman a wannan lokaci da bayanan ƙarya da amfani da fasahar AI ke yawaita.
