Kyaftin ɗin tawagar Faransa kuma ɗan wasan gaba na Real Madrid, Kylian Mbappé, ya zama ɗan wasan da ya fi kowa cin ƙwallaye a tarihin Gasar Kofin Duniya ta FIFA, bayan ya kammala gasar ta 2026 da jimillar ƙwallaye 22.
Sabon jadawalin masu cin ƙwallaye mafi yawa a tarihin gasar, wanda FIFA ta fitar bayan kammala Gasar Kofin Duniya ta 2026 da aka gudanar a Amurka, ya nuna Mbappé ya wuce kyaftin din Argentina, Lionel Messi, wanda ya kammala tarihinsa a gasar da ƙwallaye 21.
Mbappé ya kai wannan matsayi ne bayan buga wasanni 22 kacal a gasar Kofin Duniya, yayin da Messi ya ci ƙwallaye 21 ne cikin wasanni 34 da ya buga a gasar wanda ya buga har sau shida. Tsohon ɗan wasan Jamus, Miroslav Klose, wanda ya riƙe tarihin na tsawon sama da shekara goma da ƙwallaye 16, yanzu ya koma matsayi na uku.
Ga cikakken jerin sunayen ‘yan wasan da suka fi yawan cin ƙwallaye a tarihin Gasar Kofin Duniya:
1. Kylian Mbappé (Faransa) – Ƙwallaye 22 a wasanni 22. 2.Lionel Messi (Argentina) – Ƙwallaye 21 a wasanni 34. 3. Miroslav Klose (Jamus) – Ƙwallaye 16 a wasanni 24. 4. Ronaldo Nazário (Brazil) – Ƙwallaye 15 a wasanni 19. 5. Gerd Müller (Jamus) – Ƙwallaye 14 a wasanni 13. 6. Harry Kane (Ingila) – Ƙwallaye 14 a wasanni 18. 7. Just Fontaine (Faransa) – Ƙwallaye 13 a wasanni shida. 8. Pelé (Brazil) – Ƙwallaye 12 a wasanni 14. 9. Jürgen Klinsmann (Jamus) – Ƙwallaye 11 a wasanni 17. 10. Sándor Kocsis (Hungary) – Ƙwallaye 11 a wasanni biyar. 11. Cristiano Ronaldo (Portugal) – Ƙwallaye 11 a wasanni 27.
