Gwamnan Jihar Kano, Abba Kabir Yusuf, ya bayyana cewa gwamnatinsa ta biya Naira biliyan 32 don rage bashin alawus da sauran kuɗaɗen ma’aikata da ya gada daga tsohuwar gwamnati.
Jimillar bashin da ya gada ya kai Naira biliyan 48, kuma gwamnan ya bayyana wannan ci gaba ne yayin bikin Ranar ‘Yancin Kai na Nijeriya da aka gudanar a Filin Wasa na Sani Abacha da ke Kano.
Gwamna Yusuf ya ƙara da cewa gwamnati na ci gaba da biyan kuɗaɗen fansho na wata-wata a kan lokaci, sannan ta ƙara mafi ƙarancin fansho daga Naira 5,000 zuwa Naira 20,000 duk wata.
Hakazalika, ya bayyana cewa ma’aikatan jihar na samun albashinsu kafin ranar 25 ga kowane wata, kuma tuni aka fara aiwatar da sabon mafi ƙarancin albashi na Naira 71,000 domin inganta rayuwarsu.
Bayan haka, a cewarsa gwamnatinsa na ɗaukar nauyin horar da ma’aikata a kwalejin ASCON domin su ƙara samum ƙwarewa a fannin aiki da shugabanci.
A ƙarshe, gwamnan ya jaddada cewa babban burinsa shi ne mutunta haƙƙoƙi da jin daɗin ma’aikata da tsofaffin ‘yan fansho a kowane lokaci
