‘yan bindigan dake addabar al’ummar karamar Hukumar Mariga, a wata wasika da suka aike wa hakiman yankunan, sun bukaci yankunan da su biya su Naira Miliyan dari-dari in suna son a tsagaita wuta suje gonakansu cikin kwanciyar hankali.
Hakimin kauyen Bobi, Alhaji Mohammed Labbo, na daga cikin wadanda suka samu wasikar daga ‘yan ta’addan suna neman a ba su kudi Naira miliyan 100 domin tsagaita hare-haren da suke kai wa al’ummar yankin.
Bobi yankine dake da dimbin arzikin manoma da gonakai wanda ya shahara da noma da kiwo na miliyoyin naira.
A wani Yankin kuma, an gano cewa ‘yan bindigar sun bukaci shugaban al’ummar Kontokoro, Alhaji Salihu Isyaka da ke karamar hukumar Mariga da su biya Naira miliyan 40.
Kontokoro itama al’umma ce da ta shahara wajen noma, tana da iyaka da jihohin Kebbi da Zamfara a arewa maso yammacin Nijeriya, wadanda ke fama da munanan hare-haren ta’addanci.
