Tattaunawar da aka yi ta wayar tarho karo na farko tsakanin shugabannin kasashen Sin da Amurka bayan wadda aka yi tsakanin manyan jami’an kasashen biyu kan cinikayya da tattalin arziki, ta ja hankalin al’ummar duniya. Sakamakon wani nazari da kafar CGTN ta kasar Sin ta gudanar tsakanin masu amfani da intanet a duniya ya nuna cewa, kaso 74.7 na masu bayar da amsa sun yi imanin cewa, tattaunawar shugabannin biyu ta aike da kyakkyawan sako na sassauta takaddamar cinikayya tsakanin kasashen da ingiza mayar da dangantakarsu kan turbar da ta dace.
A baya-bayan nan, manyan jami’an kasashen biyu sun tattauna kan batutuwan cinikayya da tattalin arziki a birnin Geneva na kasar Switzerland, bisa bukatar bangaren Amurka, wadda ta alamta wani muhimmin mataki na samun ci gaba wajen warware batutuwa masu ruwa da tsaki ta hanyar tattaunawa da tuntubar juna, lamarin da al’ummomin bangarorin biyu da ma na duniya suka yi maraba da shi.
Tun bayan tattaunawar kuma, kasar Sin ta fara aiwatar da yarjejeniyar da suka cimma. Don gane da hakan, kaso 95.7 na wadanda suka bayar da amsa a nazarin na CGTN na ganin cewa, ya kamata bangaren Amurka ya yi biyayya ga matsayar da kasashen biyu suka cimma na warware takaddamar cinikayya da aiwatar da yarjejeniyar da suka cimma a tattaunawar Geneva.
CGTN ta wallafa nazarin ne a dandamalinta na harsunan Ingilishi da Spaniyanci da Faransanci da Larabci da Rashanci. Kuma mutane 5610 ne suka kada kuri’a tare da bayyana ra’ayoyinsu cikin sa’o’i 12. (Fa’iza Mustapha)
