Hukumar Yaƙi da Sha da Fataucin Miyagun Ƙwayoyi ta Ƙasa (NDLEA) ta kama ƙwayoyin tramadol miliyan 1.63 da aka ɓoye a cikin manyan motocin dakon kaya guda biyu da ke kan hanyarsu daga Legas zuwa Kano. Hukumar ta ce kamen wani ɓangare ne na sumamen da take yi kan wata ƙungiyar masu safarar miyagun ƙwayoyi da ke aiki tsakanin ƙasashe.
A cewar NDLEA, jami’anta sun fara tare wata motar a ranar 2 ga Yuli a kan titin Lagos-Ibadan, inda suka gano ƙwayoyi 853,000 na tramadol mai ƙarfi 250mg da aka ɓoye a wani sashi da aka ƙera ƙarƙashin motar. An kama direban motar mai suna Jabir Kabiru, mai shekaru 22. Bayan kwana biyu kuma, aka sake kama wata motar a hanya ɗaya da ke ɗauke da kwayoyi 777,000, tare da cafke direbanta Muhammed Nuhu, mai shekaru 22.
Hukumar ta kuma bayyana cewa ta kama wasu ƙwallaye biyu na tabar wiwi ta zamani (Canadian Loud) masu nauyin kilo 4.7 a Filin Jirgin Sama na Murtala Muhammed da ke Ikeja. An ce an shigo da kayan ne daga Kanada ta jiragen British Airways da Ethiopian Airlines. Bincike ya kai ga kama wasu mutane huɗu, ciki har da wata ‘yar kasuwa mai suna Chioma Nneka Mokeme, wadda ta amsa cewa wani abokinta da ke Kanada ne ya shigar da ita harkar safarar miyagun ƙwayoyi.
A wasu sumame daban, NDLEA ta kama wani tsoho mai shekaru 80, Chika Ugwoji, a Jihar Ribas tare da gram 800 na tabar wiwi. A Jihar Edo kuma, an kama ma’aurata da ake zargi da adana miyagun ƙwayoyi, inda aka ƙwace buhuna 22 na tabar wiwi da kuma Canadian Loud masu nauyin sama da kilo 400 gaba ɗaya.
Shugaban NDLEA, Birgediya Janar Mohamed Buba Marwa (mai ritaya), ya yabawa jami’an hukumar bisa nasarorin da suka samu, tare da ƙarfafa su su ci gaba da yaƙi da safarar miyagun ƙwayoyi a faɗin ƙasar.
