Ɗan wasan gaban Faransa da Real Madrid, Kylian Mbappé, ya ce zai yi matuƙar mamaki idan bai lashe kyautar gwarzon ɗan wasan duniya ta Ballon d’Or ta shekarar 2026 ba.
Mbappé ya bayyana hakan ne yayin da yake amsa tambayoyin manema labarai kan damar da yake da ita na lashe babbar kyautar.
Ɗan wasan yana cikin ’yan wasa 30 da aka zaɓa domin neman kyautar Ballon d’Or ta bana.
Yana daga cikin waɗanda ake ganin suna da damar lashe kyautar, inda zai fafata da ’yan wasa irin su Lamine Yamal na Barcelona da Harry Kane na Bayern Munich.
Mbappé ya ce irin nasarorin da ya samu a kakar wasan da ta gabata sun sa yake ganin ya dace a ba shi kyautar.
“Ina ganin wannan shi ne lokacin da ya dace na lashe kyautar. Don haka, idan ban samu ba, zai ba ni mamaki,” in ji Mbappé.
Mbappé ya lashe takalmin zinare a gasannin da dama, ciki har da gasar zakarun Turai, La Liga da kuma gasar cin kofin duniya.
Haka kuma, ya lashe kyautar takalmin zinare na wanda ya fi zura ƙwallaye a Turai a kakar wasan da ta gabata.
Za a gudanar da bikin bayar da kyautar Ballon d’Or a watan Oktoba a birnin Landan na ƙasar Ingila.
