Ƙungiyar Kwadago ta Nijeriya (NLC) ta yi barazanar tsunduma yajin aikin gama-gari a faɗin ƙasar nan idan gwamnatin tarayya ta gaza magance buƙatun ma’aikata a taron da aka shirya gudanarwa ranar 27 ga watan Oktoba.
Matakin na zuwa ne bayan wani taro tsakanin wakilan gwamnati da shugabannin ƙungiyoyin ƙwadago a Abuja, wanda ya ƙare ba tare da cimma matsaya ba.
Ƙungiyoyin ƙwadagon sun ce za su fara shirya ma’aikata a faɗin ƙasar domin shiga yajin aiki idan gwamnati ta gaza ɗaukar matakan da suka dace.
Ga manyan buƙatu shida da ƙungiyoyin ke son gwamnati ta magance:
1. Rage farashin man fetur domin rage tsadar rayuwa ga ma’aikata.
2. Sake tattaunawa kan mafi ƙarancin albashi da kuma fara shirin samar da sabon tsarin albashi.
3. Aiwatar da yarjejeniyar rangwamen haraji da aka amince da ita domin rage nauyin kuɗaɗen da ma’aikata ke biya.
4. Biyan bashin ƙarin albashi da sauran haƙƙoƙin da ma’aikata ke bin gwamnati.
5. Aiwatar da yarjejeniyar da aka cimma da ƙungiyoyin ma’aikatan lafiya (JOHESU) a ranar 5 ga watan Fabrairu, 2026.
6. Biyan alawus-alawus da ma’aikatan gwamnati ke bi, ciki har da alawus na musamman da na annoba.
Ƙungiyoyin ƙwadagon sun buƙaci manyan jami’an gwamnati da aiwatar da waɗannan buƙatu su halarci taro na gaba domin nemo mafita.
