Shugabar kamfanin jaridar LEADERSHIP Media Group, Zainab Nda-Isaiah, ta halarci bikin aza harsashin ginin wata cibiyar tallafa wa sabbin ’yan kasuwa a fannin fasaha a Wuye, Abuja, tare da uwargidan shugaban ƙasa, Oluremi Tinubu, da sauran manyan baƙi ranar Juma’a.
Aikin haɗin gwiwa ne tsakanin Hukumar Bunƙasa Fasahar Sadarwa ta Ƙasa (NITDA), gwamnatin Japan da Hukumar Haɗin Gwiwar Ƙasashen Duniya ta Japan (JICA).
Cibiyar za ta taimaka wa matasan Nijeriya wajen mayar da sabbin dabarunsu zuwa kasuwanci ta hanyar fasaha, bincike, ƙirƙire-ƙirƙire da koyon ƙwarewa.
Da ta ke jawabi a wajen taron, uwargidan shugaban ƙasa ta ce aikin zai samar da damammaki ga matasa da mata, ya taimaka wajen samar da ayyukan yi tare da bai wa masu ƙirƙire-ƙirƙire na Nijeriya damar shiga kasuwannin duniya.
Daraktan Janar na NITDA, Kashifu Inuwa Abdullahi, ya ce shirin zai kuma taimaka wajen faɗaɗa damar amfani da fasahar zamani da bunƙasa tattalin arziƙi.
