NSCDC Ta Kai Samame Masana’antar Lemo Da Ke Amfani da Gurɓatattun ’Ya’yan Itace A Legas

Rundunar Hukumar Tsaro ta Sibil Difens (NSCDC) ta kai samame wata masana’anta da ake zargin tana haɗa gurɓataccen ruwan ’ya’yan itace (lemo) a yankin Onilegbale, Alabi Aradagun da ke Badagry, Jihar Legas, inda ta kama mata biyu.

An bayyana hakan ne ta wani bidiyo da shafin CityMood Badagry ya wallafa a shafin X ranar Litinin, wanda ya nuna jami’an NSCDC suna gabatar da wadanda aka kama tare da kayayyakin da aka kwato.Wani jami’in NSCDC ya ce ana sayar da kayayyakin da ake zargin ne a wasu kasuwannin Legas, sannan ana kai su Jihar Edo da sauran sassan Nijeriya.

Ya ce matan biyu, wadanda shekarunsu ke tsakanin 48 zuwa 50, sun kuma yi amfani da yara maza da mata masu shekaru 15 zuwa 16 wajen haɗawa da kuma kunshe abubuwan shan.

Rundunar ta ce tana ci gaba da bincike domin gano cikakken bayani kan ayyukan masana’antar da kuma wadanda ke da hannu wajen samar da kayayyakin.