Hukumar tsaro ta NSCDC a Jihar Kano, ta kama wasu mutane biyu da ake zargi da satar mota a Ladanai Junction, kan titin Eastern Bypass.
An kama mutanen, Abdullahi Sani mai shekaru 61 da Abdullahi Suleiman mai shekaru 63, ne yayin da jami’an NSCDC ke sintiri da misalin ƙarfe 2:10 na dare.
A cewar NSCDC, mutanen suna tuƙa wata mota ƙirar Toyota Carina II Wagon ja mai lamba LFA 417 AA (Nasarawa).
An ce an sace motar ne kwanaki uku kafin a kama su.
Hukumar ta kuma kama wani ma’aikacin kamfani mai shekaru 45, Suleiman Shehu, bisa zargin lalata wata waya mallakin kamfanin Triumph Nigeria Limited a Bompai, ƙaramar hukumar Nassarawa.
A halin yanzu, mutanen ukun suna hannun jami’an tsaro, yayin da ake ci gaba da gudanar da bincike.
NSCDC ta ce za a gurfanar da su a gaban kotu idan gama bincike.
Hukumar ta buƙaci mazauna Kano da su kasance masu lura da abubuwan da ke faruwa tare da kai rahoton duk wani abun zargi ga jami’an tsaro.
