Masu garkuwa da mutane sun nemi a biya su kuɗin fansa naira biliyan ɗaya domin sakin mutane 20 da aka yi garkuwa da su, waɗanda ke shirin fara yi ƙasa hidima (NYSC) a Jihar Oyo.
An sace mutanen ne ranar Alhamis yayin da suke tafiya daga Ibadan zuwa sansanin NYSC da ke Jihar Imo.
Masu garkuwa da mutanen sun nemi naira miliyan 50 kan kowane mutum, inda suka bai wa iyayensu sa’o’i 24 su biya kuɗin.
Iyalin waɗanda aka sace sun roƙi Olubadan na Ibadan, Oba Rashidi Ladoja, da ’yansanda da su taimaka wajen ceto ’ya’yansu.
’Yansanda sun ce jami’an tsaro suna aiki domin kuɓutar da waɗanda aka sace.
Hukumomin tsaro a Jihar Imo kuma sun ce sun gano sansanin da ake zargin masu garkuwa da mutanen ke tsare da mutanen ta hanyar amfani da jirage marasa matuƙa.
Sai dai an dakatar da aikin ceton na ɗan lokaci saboda zargin cewa an dasa abubuwan fashewa a kusa da sansanin.
Sufeto-Janar na ’yansanda, Olatunji Disu, ya tura wani babban jami’in ’yansanda zuwa Jihar Imo domin jagorantar aikin ceto.
