Ɗan Majalisar Wakilai, Alhassan Ado Doguwa, ya ce ƙara samun haɗin kai a cikin jam’iyyar APC zai taimaka wa jam’iyyar wajen samun nasara a zaɓen 2027 a Jihar Kano.
Doguwa, wanda ke wakiltar mazaɓar Doguwa/Tudun Wada a Majalisar Wakilai, ya bayyana hakan ne yayin da yake magana da magoya bayansa a Ƙaramar Hukumar Doguwa.
Ya ce wasu tsoffin abokan hamayyar siyasa yanzu sun koma APC, lamarin da ya samar da ƙarin haɗin kai tsakanin ’yan jam’iyyar a Doguwa da Tudun Wada.
Doguwa ya yi kira ga ’yan APC da su haɗa kai tare da tallafa wa jam’iyyar a dukkan matakai.
Ya kuma yi kira ga ’yan Nijeriya da su mara wa Shugaba Bola Tinubu baya wajen neman wa’adin mulki na biyu a zaɓen 2027.
Game da manufofin tattalin arziƙin gwamnati, ciki har da cire tallafin man fetur da sauye-sauyen haraji, Doguwa ya amince cewa ’yan Nijeriya na fuskantar matsaloli.
Ya ce za a iya sake duba irin waɗannan manufofi idan ya zama dole.
Ya kuma yi alƙawarin ci gaba da isar da ƙorafe-ƙorafen al’ummarsa ga gwamnatin tarayya.
