An yi taron manema labarai na ministan harkokin waje, a lokacin taron shekara-shekara na majalisar wakilan jama’ar Sin wato NPC jiya Lahadi, abun ya jawo hankalin duniya sosai.
Wannan taro da aka kwashe kusan mintuna 90 ana gudanarwa, an gabatar da tambayoyi 21, kuma ministan harkokin wajen kasar Sin Wang Yi, ya yi cikakken bayani kan manufofin harkokin waje na Sin, inda ya yiwa kasashen waje karin haske game da matakan da ake dauka, wato “abin da Sin ke goyon baya”, da “abin da Sin ke adawa da shi”, da “abin da Sin ke yi”.
A takaice, muna iya ambatar furucin Wang a taron, cewar “Sin ta samar da kwanciyar hankali, da tabbaci mafi daraja ga duniya mai fuskantar rikici da sauye-sauye, kuma ta zama babban ginshikin da ba za a iya maye gurbinsa ba a cikin rudanin duniya.”
Ya ce, “Karfin tuwo ba ya nufin karfin hujja. Ya kamata manyan kasashe su jagoranci bin doka, da rikon amana, da bin tsarin doka”, “yin watsi da MDD da gina sabon tsari, ko kafa kungiyoyin kawance tare da kebe su, ba zai sami goyon bayan jama’a ba, kuma ba zai dore ba”, “bangaren Sin bai yarda da tunanin ‘hadin gwiwar manyan kasashe mafiya karfi’ ba”… Wadannan kalmomin ministan harkokin waje na Sin, sun nuna adawa ga kunnon kan babakere da nuna fin karfi a siyasance, kuma sun bayyana matsayin Sin na kasancewa babbar kasa dake sauke nauyin dake wuyanta, da ra’ayinta na kare matsayin MDD, da kare nasarorin yakin duniya na biyu, da kuma gina tsarin dogaro da mabambantan bangarori a harkokin duniya.
Ya ce, “Nauyin kasashe mafiya karfi shi ne amfanar duniya baki daya”, “ra’ayin bangaranci yana haifar da rashin taimako, kuma hadin kai yana kawo karfi”, “inganta kasashe ta yadda za su yi amfani da juna da samun ci gaba ta bude kofa, da raba damammaki, da samun ci gaba tare da amfanar da juna” da sauransu.
A yayin taron manema labarai, ministan harkokin waje na Sin ya yi cikakken bayani kan abin da shugaba Xi Jinping ya gabatar dangane da inganta tattalin arzikin duniya mai fa’ida dake shafar kowa da kowa, wanda ya nuna niyyar Sin ta nacewa hanyar bude kofa da hadin gwiwa, da kuma cin moriyar tare.
A duniyar yau, ana fuskantar sauye-sauye, da canje-canje da ba a taba ganin irinsa cikin shekaru 100 da suka gabata ba: Sin a matsayin babbar kasa mai karfi ta sauke nauyin dake wuyanta bisa iyakacin kokari. Sin mai ra’ayin cin moriya tare da son zaman lafiya, ta zama ginshigi ga duniya mai inganci, kuma ba ma matakin ya kawo fa’ida ne kawai ga al’ummar Sin ba, har ma da farin ciki ga al’ummar duniya baki daya. (Amina Xu)
