Rahotanni sun bayyana cewa ƙungiyar ƙwallon ƙafa ta Real Madrid ta ci tarar ’yan wasanta biyu, Federico Valverde da Aurélien Tchouaméni, sakamakon faɗan da suka yi a tsakaninsu.
Jaridu a ƙasar Spain sun ruwaito cewa tarar ta kai Yuro 500,000.
Wannan ta zama tara mafi girma da aka taɓa ci a tarihin ƙungiyar.
Lamarin ya biyo bayan taƙaddamar da ta ɓarke tsakanin ’yan wasan tsakiyar biyu yayin atisaye, inda har aka kai Federico Valverde asibiti domin duba lafiyarsa.
Tchouaméni ya koma atisaye a ranar Juma’a, amma ana sa ran Valverde ba zai buga wasan Laliga da FC Barcelona ba a ƙarshen mako.
A cikin sanarwar da ƙungiyar ta fitar, ta ce:“Real Madrid C.F. tana sanar da cewa, bayan abubuwan da suka faru a ƙungiyar, waɗanda suka haifar da ruɗani tsakanin ’yan wasa, kwamitin ladabtarwa ya yanke shawarar hukunta ’yan wasanmu Federico Valverde da Aurélien Tchouaméni, waɗanda suka bayyana yau a gaban jami’in bincike.”
Sanarwar ta ƙara da cewa:“Lokacin da suka bayyana a gaban kwamitin, ’yan wasan sun nuna matuƙar nadama kan abin da ya faru, tare da neman afuwar junansu. Haka kuma sun nemi afuwar kwamitin, abokan wasansu, ma’aikatan horarwa da kuma magoya baya. Dukkaninsu sun bayar da cikakken haɗin kai ga Real Madrid, tare da bayyana cewa a shirye suke su karɓi duk wani hukunci da ƙungiyar ta ga ya dace da su.”
Discussion about this post