Shugaban kasar Sin Xi Jinping da takwaransa na Amurka Donald Trump sun cimma matsaya kan abubuwa guda takwas, kamar yadda wata sanarwa da aka fitar ta bayyana bayan kammala ziyarar da Xi ya kai Amurka a jiya Jumma’a.
Sanarwar ta bayyana cewa, shugabannin biyu sun amince su gina dangantaka mai ma’ana bisa manyan tsare-tsare cikin kwanciyar hankali a tsakanin Sin da Amurka, wacce ke da tushe a kan girmama juna, da adalci da kuma sakayyar alheri ga juna.
Sun kuma amince su goyi bayan juna, ganin cewa kasar Sin za ta karbi bakuncin taron shugabannin kasashen kungiyar APEC a watan Nuwamban shekarar 2026, yayin da Amurka kuma za ta karbi bakuncin taron kolin shugabannin kungiyar G20 a watan Disamba; inda suka bayyana aniyarsu ta halartar tarukan juna.
Game da batun kasar Iran kuwa, Xi da Trump sun amince cewa ya kamata Tehran ta cika alkawarin da ta yi na kin kera makaman nukiliya. Sun kuma bayyana cewa babu wata kasa ko hukuma da za ta caji kudin wucewa ta hanyoyin ruwa na kasa da kasa.
Xi ya kai ziyarar aiki a Amurka ne daga ranar Laraba zuwa Jumma’a, inda a yayin ziyarar, ya yi tattaunawa mai zurfi da Trump kan dangantakar kasashen biyu, da kuma muhimman batutuwan kasa da kasa da na shiyya-shiyya. (Abdulrazaq Yahuza Jere)
