An gudanar da babban taro kan kirkire-kirkire da ci gaba ba tare da gurbata muhalli ba na Ziri Daya da Hanya Daya na 2026, jiya Litinin a yankin Hong Kong na Sin. Taron ya hada jami’ai da masana da shugabannin masana’antu, domin tattauna hanyoyin samun ci gaba mai dorewa da inganta karkata ga hanyoyin kare muhalli, ga kasashe masu tasowa.
Cikin jawabinsa, Huang Runqiu, ministan kula da muhalli da halittu na kasar Sin ya ce kasarsa ta kasance mai runguma da hada dabarun kare muhalli da baki dayan tsari da harkokin bunkasa tattalin arziki da zamantakewa. Ya ce bisa burinta na samun al’umma mai makoma ta bai daya ga dan adam, kasar Sin na ci gaba da zurfafa hadin gwiwa da kasashen duniya a bangarori kamar na karkata ga rage fitar da hayakin carbon da kare muhalli da halittu.
Ya ce shirin kare muhalli da ke karkashin hadin gwiwar shawarar Ziri Daya da Hanya Daya, ya dogara kan karfin Sin a bangaren masana’antu da fasaha, kuma ya yi daidai da bukatun ci gaba na kasashe da dama, haka kuma yana inganta aiwatar da dabarun koma wa hanyoyi masu kare muhalli a karin kasashe masu tasowa. (Mai fassara: Fa’iza Mustapha)
