Gwamnatin kasar Sin ta fitar da wasu matakai domin saukakawa ‘yan kasuwa da kwararru daga kasashen waje, domin gudanar da harkokinsu a babbar kasuwar cinikayya cikin ‘yanci ta duniya ta tashar jiragen ruwa da ke lardin Hainan.
A cewar sanarwar da gwamnati ta fitar a yau Alhamis, sabbin tsare-tsare da aka fitar domin gudanar da harkoki a kasuwar hada-hadar kayayyaki ta tashar jiragen ruwan, sun hada da cinikayyar makamashi, hidimomin ayyukan kula da lafiya, da harkokin kasuwanci.
A karkashin tsare-tsaren, likitoci ‘yan kasashen waje da suke da halastaccen lasisin aiki a kasashen ketare, za su samu izinin gudanar da gwaje-gwajen lafiya da bayar da magunguna a lardin Hainan na tsawon shekaru uku, tare da damar samun tsawaita izinin, bisa ka’idojin hukumomin da abin ya shafa.
Kazalika an samar da karin tsare-tsare masu sauki ga ‘yan kasashen waje, game da sha’anin shaidar izinin yin aiki da shaidar iznin zama a kasar Sin. (Mai fassara: Suleiman Suleiman)
