Kwanan nan, wakilai sama da 20 da suka samu lambar yabo a “gasar kirkire-kirkire ta samar da misalan amfani da fasahar AI ta matasan kasashen Afirka” sun kammala ziyararsu a biranen Beijing da Shanghai na kasar Sin.
Wannan gasar ta tattara misalai 738 da matasa daga kasashen Afirka 47 da suka hada da Najeriya, Kenya da Rwanda, da dai sauransu, suka gabatar, inda aka hada manyan misalai 114 cikin littafin “tarin misalan kirkire-kirkiren amfani da fasahar AI ta matasan kasashen Afirka”. Irin wannan babbar himma da kwazo ta matasan Afirka na shiga gasar ta nuna cewa, matasan na matukar fatan a fahimci tunaninsu tare da tattara shi da kuma yada shi. Gudanar da gasar ya kuma gina wata gada ta mu’amalar basirar matasan Sin da Afirka.
A cibiyar mutum-mutumin inji ta Yizhuang dake birnin Beijing, matasan Afirka sun ga sabon yanayin amfani da na’urori masu sarrafa kansu da fasahar AI ke tafiyar da su, kuma a ziyarar da suka yi a kamfanin Xiaomi dake Yizhuang, sun ga yadda ake tafiyar da na’urori masu sarrafa kansu da yadda ake kera na’urorin a hakika, ban da wannan kuma a dandalin Mosu na Shanghai, an nuna sakamakon nazarin fasahar zamani da yadda za a yi amfani da su a rayuwar yau da kullum.
Bisa hakan, Sin ta nuna wa matasan Afirka ainihin yanayin masana’antun AI a fagen aiki.Bugu da kari, a jami’ar Beijing da jami’ar Fudan, matasan Sin da Afirka sun zauna tare suna tattaunawa kan batun horar da kwararru da kirkire-kirkire, kuma a taron musayar ra’ayoyi na dandalin Mosu, wakilan matasan Afirka bi-da-bi sun hau dandali don bayyana misalansu, yayin da ma’aikata Sinawa ke saurara tare da gabatar da tambaya, da tattaunawa tare.
Wannan aiki ba “Sin na koya wa Afirka yadda ake amfani da fasahar AI” ba ne, a hakika yana samar da dandalin hadin gwiwa. Hakan na nufin idan wani matashin Afirka ya zo da shirinsa, zai iya samun abokin hadin gwiwa a fannin fasaha a nan, da yadda za a yi amfani da ita, ta hakan tunanin matasan Afirka zai iya amfanar da masana’antu da zaman rayuwar jama’a.
A karshen ziyarar, wasu wakilan matasan Afirka sun ce, suna fatan kai abin da suka gani da wanda suka koya a Sin zuwa Afirka, “domin basirar kirkire-kirkire ta samu ci gaba a kasashensu”. Wannan zai kasance tamkar matasan Afirka suna shuka tsaba a kasashensu, kuma abin da Sin ke samar musu shi ne takin da zai sa tsabar ta yi girma lami lafiya. Idan an dubi wannan batu, za a tabbatar da cewa gani ya kori ji kan alfanun hadin gwiwar fasahar AI tsakanin Sin da Afirka. (Marubuciya: MINA)
