Idan ba mu manta ba a kwanakin baya shugaban kasar Sin Xi Jinping, ya aike da wata wasika ga dandalin tattauna batutuwan jagorancin duniya na Xiong’an, wadda a ciki ya kara fayyace muhimmancin dake tattare da aiwatar da sauye-sauye da inganta tsarin jagorancin duniya, da ma saita alkibla don ingiza aiwatar da shawarar inganta jagorancin duniya ta GGI. Ko shakka babu, wannan wasika ta shugaba Xi, ta sake jaddada aniyar kasar Sin ta sauke nauyin dake wuyanta na aiki tukuru, tare da sauran kasashen duniya wajen gina duniya mai karin adalci da daidaito.
A shekarar 2025 ne shugaba Xi ya gabatar da shawarar GGI, wadda ta kasance waraka ga tarin matsalolin da duniya ke fuskanta, a fannin cike gibin jagoranci, da gina makoma ta gari ga bil’adama. A cikin shekara daya kacal, shawarar GGI ta yi matukar samun karbuwa daga kasashe da hukumomin kasa da kasa sama da 160. Kazalika, sama da kasashe 60 sun shiga kawancen shawarar ta GGI. Har ila yau, an shigar da manyan ginshikanta cikin kundin kungiyoyin kasa da kasa irinsu G20, da kungiyar hadin gwiwa ta Shanghai ko SCO da kungiyar BRICS.
Cikin shekara guda, shawarar GGI tana kara samun karbuwa, tasirinta na kara fadada, kana shawarar ta zamo muhimmin ra’ayi da sassan kasa da kasa ke kara amincewa da ingancinta. Wadannan sassa na kara rungumar shawarar GGI a matsayin turbar kyautata cudanyar bangarorin kasa da kasa, suka kallonta a matsayin garkuwa ga manufar tabbatar da gaskiya da adalci, yayin da ake tunkarar kalubalen dawowar manufofin nuna karfin tuwo da danniya a duniya. Ga al’ummu masu yawa, shawarar GGI na samar da kyakkyawar turba ta raba ci gaban bai daya, da tsaro, da tabbaci da ake bukata a wannan duniya mai fama da yanayi na tangal-tangal.
Alal hakika, managarcin tsarin jagorancin duniya na taimakawa wajen cimma moriyar bai daya ta dukkanin kasashe, kuma wajibi ne daukacin sassan kasa da kasa su yi aiki tare wajen cimma wannan buri. Kasar Sin ta shirya tsaf wajen yin aiki tare da daukacin bangarori don daga tunanin inganta jagorancin duniya ta hanyar gudanar da tuntuba mai ma’ana, da hada hannu wajen bayar da gudunmawa don cimma moriyar bai daya, da gina karfin tunkarar kalubale bisa hadin gwiwa.
A yau, sassan kasa da kasa na da alhakin yin hadin gwiwa don ingiza aiwatar da wannan shawara ta GGI, kana da wanzar da tabbaci, da karsashin cimma nasarar zaman lafiya mai dorewa a wannan duniya mai fuskantar sauye-sauye da tangal-tangal, tare da aiki bai daya domin gina al’umma mai makomar bai daya ga daukacin bil’adama karkashin wannan muhimmiyar shawara. (Saminu Alhassan)
