Rundunar Sojin Ƙasa ta Nijeriya ta tura sabuwar bataliya da rundunar manyan makamai zuwa Jihar Kano domin ƙarfafa tsaro da inganta martanin rundunar ga sabbin barazanar tsaro. Rundunar ta ce kafa waɗannan rukunonin sojoji na daga cikin matakan faɗaɗa ayyukanta da inganta tsarin tsaron ƙasar.
Kwamandan Runduna ta Ɗaya ta Sojin Ƙasa kuma Kwamandan sashi na Ɗaya na rundunar haɗin gwiwa ta Operation Fansan Yamma, Manjo-Janar Abubakar Sadique Muhammad Wase, ne ya bayyana hakan yayin ziyarar tantance ayyukan sojoji a ranar 28 da 29 ga Oktoba, 2026. Ya ziyarci Bataliya ta 24 da ke Tudun Wada da Rundunar Makamai ta 311 da ke Dambatta, a Jihar Kano.
A cewar wata sanarwa da Kakakin Hulɗa da Jama’a na Runduna ta Ɗaya, Kanal Abubakar Abdullahi, ya fitar a ranar Alhamis, Wase ya ce sabbin rukunonin sojojin na buƙatar jajircewa, da juriyar aiki da isasshen tallafi domin cimma manufofin da aka kafa su a kai.
Ya kuma tabbatar wa sojojin cewa rundunar tana aiki tare da Gwamnatin Jihar Kano domin taimaka wa rukunonin su fara gudanar da ayyukansu yadda ya kamata. Wase ya ƙara da cewa jin daɗin jami’an soji da samar musu da kayan aiki da sauran tallafin gudanar da ayyuka na daga cikin abubuwan da rundunar ke ba fifiko.
Janar ɗin, wanda ya samu rakiyar Kwamandan Birged ta Uku, Birgediya-Janar Saka Jimoh, ya kuma gana da shugabannin ƙananan hukumomin Dambatta da Tudun Wada.
Ya buƙaci al’ummomin yankunan da su ba sojojin haɗin kai da goyon baya domin ƙarfafa tsaro a faɗin jihar.
