Wata babbar Kotun Tarayya da ke Abuja ta umarci Hukumar Zaɓe Mai Zaman Kanta ta Ƙasa (INEC) da ta wallafa sunan tsohon Gwamnan Jihar Imo, Rochas Okorocha, a matsayin ɗan takarar jam’iyyar APC na kujerar Sanatan Imo ta Yamma a babban zaɓen 2027.
Mai shari’a Obiora Egwuatu ya kuma umarci gwamnan jihar na yanzu, Hope Uzodinma, da ya daina gabatar da kansa a matsayin ɗan takarar APC na zaɓen Sanatan da aka shirya gudanarwa ranar 16 ga watan Janairu, 2027.
Alƙalin ya bayar da waɗannan umarni ne yayin yanke hukunci kan ƙarar da Okorocha ya shigar, inda ya ƙalubalanci amincewar jam’iyyar da Uzodinma a matsayin ɗan takararta.
Mai shari’a Egwuatu ya ce shaidun da aka gabatar a gaban kotu sun tabbatar da cewa Okorocha ne ya lashe zaɓen fidda gwani na APC da aka gudanar ranar 18 ga watan Mayu, 2026.
Saboda haka, kotun ta umarci APC da ta miƙa sunan Okorocha wajen INEC a matsayin ɗan takararta na kujerar Sanatan Imo ta Yamma a zaɓen mai zuwa.
