Mahukuntan kasar Sin sun fitar da wani tsarin aiki na musamman, wanda zai bayar da damar bunkasa hade hidimomin AI da makamashi mai tsafta.
Karkashin shirin, nan zuwa shekarar 2030, an tsara shigar da karin kaso mai yawa na makamashi mai tsafta cikin bukatun ayyukan lissafe-lissafe na AI, yayin da a daya bangaren za a kara kyautata cin gajiyar fasahar AI a sassan aiki da makamashi.Karkashin wannan manufa, kasar Sin na fatan kafa sabon tsarin samar da ci gaba, mai kunshe da bunkasawa, da zurfafa hade fasahar AI da sashen makamashi, kamar dai yadda shirin ya kunsa.
Hukumar lura da makamashi ta kasar Sin ko NEA, da hukumar raya kasa da aiwatar da sauye-sauye, da ma’aikatar masana’antu da fasahar sadarwa, da hukumar tattara bayanai ta kasar Sin ne suka fitar da shirin.
A cewar hukumar NEA, tsarin aikin na da nufin tabbatar da kariya, da dogaro da kai a fannin samar da makamashin gudanar da ayyukan raya fannin, da ingiza sauyi zuwa fitar da mafi karancin iskar carbon, a ayyukan lissafe-lissafen na’urori masu kwakwalwa, da ingiza tsarin cimma cikakkiyar gajiya, da tsare-tsaren tattalin arziki tsakanin karfin lissafe-lissafen na’urori masu kwakwalwa da lantarki da ake bukata domin hakan. (Saminu Alhassan)
