A gun taron manema labarai da hukumar hadin gwiwar ci gaban kasashen duniya ta Sin wato CIDCA ta gudanar a yau Talata, mai magana da yawun hukumar Li Ming ya bayyana cewa, a shekarar bana, Sin ta ci gaba da daidaita shirye-shiryen ci gaban kasashe daban-daban, wanda hakan ya haifar da aiwatarwar jerin kananan ayyukan dake amfanar da jama’a cikin sauri a dukkanin fadin duniya.
Yayin da ya ambato ci gaban noma, Li Ming ya ce, Sin ta taimaka wajen kafa kauyen nunin hadin gwiwar noma na biyu tsakanin Sin da Zimbabwe, kuma ta aiwatar da ayyukan ba da taimakon fasahar noma, da aikin kafa cibiyar shukan gora ta Sin da Afirka a kasashen Afirka, kamar Kongo(Kinshasa) da Burundi, inda ta tura kwararru a fannin noma sama da 200 don habaka fasahar kara samar da amfanin gona da ta dace da bukatun wuraren.
Li Ming ya kuma bayyana cewa, a cikin shekaru biyar masu zuwa, Sin za ta yi aiki tare da kasashe abokanta, don tsara ayyukan karfafa fasahohin dijital, don amfanar da kasashe masu tasowa, da nasarorin kimiyya da fasaha da aikace-aikacen fasaha. (Safiyah Ma)
Discussion about this post