A yau Laraba ne kasar Sin ta harba sabbin taurarin dan Adam guda uku zuwa sararin samaniya ta hanyar amfani da rokar Long March-2C. An harba taurarin Shijian-30A, da Shijian-30B da Shijian-30C ne da karfe 12:01 na tsakar rana bisa agogon Beijing, daga tashar harba kumbuna ta Jiuquan dake arewa maso yammacin kasar Sin. Sun kuma shiga da’irarsu cikin nasara.
Za a yi amfani da taurarin dan Adam din uku ne a ayyukan lura da yanayi, da sauran fasahohin tantancewa masu nasaba da hakan. Kuma wannan ne karo na 608 da kasar Sin ta yi amfani da samfurin rokar Long March wajen harba taurarin dan Adam. (Saminu Alhassan)
ADVERTISEMENT
