Bisa labarin da ma’aikatar kasuwancin Sin ta fitar, daga watan Janairu zuwa Mayu na shekarar bana, an kafa sabbin kamfanoni 25,297 wadanda kasashen waje suka zuba jari a Sin, inda adadin ya karu da kashi 5.3% bisa makamancin lokaci na bara.
Jarin waje da aka yi amfani da shi a zahiri ya kai yuan biliyan 327.29. A cikin adadin kuma, jarin waje da aka yi amfani da shi a watan Mayu kawai ya karu da kashi 5.9% idan aka kwatanta da makamancin lokacin bara.
A fannin masana’antu, masana’antun fasahar zamani sun yi amfani da jarin waje yuan biliyan 130.14 a zahiri, adadin da ya kai kashi 39.8% na jimillar. Daga cikinsu, ayyukan nazari da hidimomin kere-kere, da samar da kwamfuta da kayan aiki na ofis, da kuma kera kayan aikin lantarki da sadarwa, sun karu da kashi 96.2%, da 29.7%, da kuma 18.2% bi-da-bi a cikin jarin na waje da aka yi amfani da shi a zahiri.(Safiyah Ma)
