Dakarun sojin Nijeriya sun kai jerin samame sansanin ‘yan ta’adda a Jihohin Katsina da Zamfara, inda suka kashe da dama daga cikinsu.
Rundunar ta bayyana haka ne a wata sanarwa da ta fitar da safiyar ranar Litinin.
- An Cafke Mutane 3 Kan Satar Raguna 132 A Neja
- Me Ya Fi Ci Wa Samari Da ‘Yan Mata Tuwo A Kwarya Game Da ‘Ramadan Basket’?
“A samamen da suka kai Zamfara ranar 29 ga watan Maris, dakarunmu sun yi nasarar farmakar kasurgumin dan bindiga, Hassan ‘Yantagwaye, a karamar hukumar Tsafe.
“‘Yantagwaye da tawagarsa ne suka yi garkuwa da mutane da dama tare ta’addanci a wasu yankuna Arewa Maso Yammacin Nijeriya.
“Yayin samamen, dakarun sun yi luguden wuta a kan ta’adda bayan sun yi musayar wuta, inda suka kashe uku daga cikinsu tare da kwato makamai da dama,” in ji sanarwar.
Kazalika ranar 30 ga watan Maris, dakarun sojin Nijeriya sun yi dauki ba dadi da ‘yan bindiga a wasu kauyuka na karamar hukumar Faskari da ke Katsina.
“Dakarun sun kashe ‘yan ta’adda takwas tare da kwato bindigu guda uku da kakin soji da hatsi mai yawa,” in ji sanarwar.
