Sojojin Operation FANSAN YAMMA sun kashe wasu da ake zargin ’yan ta’adda ne guda takwas, tare da ceto mutane uku da aka sace a jihohin Katsina, Kaduna da Zamfara.
Sojojin sun kuma ƙwato bindiga ƙirar AK-47 guda ɗaya, bindigogi uku ƙirar gida, babura uku, adduna da wasu layu.
Jami’in yaɗa labarai na rundunar, Kyaftin Tamuno Sinivie ne, ya bayyana hakan a cikin wata sanarwa da ya fitar a ranar Talata.
A Jihar Katsina, sojoji sun kashe mutane biyu da ake zargin ’yan ta’adda ne yayin musayar wuta a Ƙaramar Hukumar Sabuwa a ranar Asabar, 24 ga watan Oktoba.
Sun kuma ceto wani mutum mai suna Suleiman Umar, mai shekaru 42, wanda aka sace, tare da ƙwato bindiga ƙirar AK-47 da babur guda ɗaya.
A Jihar Kaduna, sojoji da ke aiki tare da ’yan sa-kai na Civilian Joint Task Force sun kashe wasu mutane shida da ake zargin ’yan ta’adda ne bayan sun daƙile wani harin kwanton ɓauna a Ƙaramar Hukumar Igabi.
Rahotanni sun ce waɗanda ake zargin sun tsere da wasu mutane biyu a wani hari da suka kai a baya.
A Jihar Zamfara kuwa, sojoji sun ceto wasu mutane biyu, Shehu Chete, mai shekaru 40, da Bugu Bedi, mai shekaru 25, a garin Bagega da ke Ƙaramar Hukumar Anka, a ranar Lahadi, 25 ga watan Oktoba.
An kai mutanen asibiti domin duba lafiyarsu kafin a miƙa su ga iyalansu.
Kyaftin Sinivie ya ce sojoji na ci gaba da sintiri da bincike domin kamo waɗanda suka tsere, ceto sauran mutanen da aka sace da kuma hana kai hare-hare.
Ya buƙaci mazauna yankunan da su riƙa bai wa jami’an tsaro sahihan bayanai game da duk wani abu da suke zargi a yankunansu.
