Rundunar sojin Nijeriya ta ce dakarunta sun tarwatsa sansanin ’yan ta’addan Lakurawa a dajin Waria, da ke ƙaramar hukumar Tangaza ta Jihar Sakkwato, tare da kashe da dama daga cikinsu.
An gudanar da aikin ne a ranar Alhamis, 15 ga watan Oktoba, 2026, yayin da sojojin suka bi ta yankunan da ke kusa da ƙauyukan Alela, Bilange da Kandam.
Rundunar ta ce sojojin sun yi musayar wuta da ’yan ta’addan, inda suka fi ƙarfin su, lamarin da ya tilasta musu tserewa.
Daga bisani, sojojin sun bi sahunsu tare da tarwatsa sansaninsu.
Haka kuma, sojojin sun ƙwato makamai da babura guda biyar a yayin aikin.
Rundunar sojin ta buƙaci al’umma da su riƙa bayar da sahihan bayanai kan duk wani motsi ko ayyukan da suke zargin ba su dace ba, domin taimaka wa jami’an tsaro wajen yaƙi da ta’addanci da tabbatar da tsaro a yankunan da abin ya shafa.
