Ministan ma’aikatar lura da jin dadin al’umma na kasar Sin Lu Zhiyuan, ya ce takardun samar da rangwamen bayar da hidimomi ga tsofaffi, masu matsakaita da larurori masu tsanani a kasar Sin, sun amfani mutane 892,000, inda darajar wadannan takardu da aka ci gajiyarsu cikin wannan shekara a kasar, ta kai kudin kasar yuan biliyan 1.72, kwatankwacin dalar Amurka miliyan 249.
Lu Zhiyuan, wanda ya bayyana hakan ga manema labarai a Asabar din nan, a gefen taron majalisar wakilan jama’ar kasar Sin dake gudana yanzu haka, ya ce Sin na kara fadada tsarin kula da tsofaffi a gidaje a dukkanin sassan kasar, yayin da dakunan cin abinci 80,000 na wannan rukuni na al’umma, ke samar da hidima ga sama da tsofaffi miliyan 3 a kullum a sassan kasar, matakin da ke taimakawa tsofaffi wajen samun kalaci yadda ya kamata.
Har ila yau, an samar da gadajen lura da tsofaffi har 495,000, domin lura da masu bukata a gidajensu, matakin da ke baiwa tsofaffin damar samun kulawar kwararru kai tsaye.
Bugu da kari, an kyautata yanayin wasu gidaje na iyalai dake tare da tsofaffi har miliyan 2.24, ta yadda gidajen za su dace da bukatun tsofaffin dake rayuwa a cikinsu. (Saminu Alhassan)
