An fara amfani da na’urar VAR ne a gasar cin kofin duniya da aka yi a Rasha a shekarar
2018 kuma ta shiga tsakani sau 20 a wasanni 64 da aka buga tun farkon fara gasar har karshe. BAR ta sauya hukunce-hukuncen alkalan wasa sau 17, ciki har da muhimmin al’amura a wasan karshe: lokacin da Faransa da Croatia su ke kunnen doki
1-1 na’urar ta sa alkalin wasa ya sauya hukuncin da ya yanke daga taba kwallo da hannu a wajen da’ira ta 18 zuwa bayar da bugun fenariti.
Faransa ta zura kwallon, inda ta shige gaba da ci 2-1 a wasan da daga karshe ta lashe wasan da ci 4-2. A gasar cin kofin dauniya da aka buga a Katar, shekaru hudu bayan haka, an yi amfani da VAR sau 27. Lokacin da aka bai wa alkalin wasan shawarar ya duba na’urar gefen fili, alkalin wasa ya suya hukuncinsa a dukkan lokuta ban da sau biyu kacal.
Na’urar da ke taimaka wa alkalin wasa na bidiyo (VAR) ta kasance babbar abin tattaunawa a gasar cin kofin duniya ta 2026, amma muhawara kan amfaninta ko akasin haka ya kai wani sabon mataki ne bayan nasarar da Argentina ta samu kan Masar a wasan zagaye na ‘yan 16 a ranar 7 ga watan Yuli.
Kasar ta Afirka, ta jagoranci wasan da ci 2-0 har zuwa lokacin da ya rage saura minti 11a tashi wasan kafin Argentina ta farfado ta ci kwallo uku a karshen wasan, lamarin da ya sa Masar ta fusata bayan an kashe kwallon da ta ci, da kuma ikirarin cewa an hana ta bugun fenariti a karshen wasa, wanda BAR ba ta shiga tsakani ba.
Kocin Masar, Hossam Hassan ya ce watakila suna son masu rike da kambun gasar su ci gaba da kasancewa a gasar. Watakila suna son Messi ya ci gaba da fafatawa a gasar.
‘Yan wasan Masar sun fusata musamman da hukuncin da aka yi musu na hana kwallon da Mostafa Zico ya ci a rabin lokaci na biyu lokacin da suke kan gaba da ci 1-0, bayan da aka hukunta dan wasan tsakiya Marwan Attia saboda taka Lisandro Martinez kafin a ci kwallon.
‘Yanwasan sun dage cewa an yi wa Mohamed Salah keta a irin wannan da’ira ta 18 din Argentina ‘yan dakika kadan kafin masu rike da kambun gasar su ci kwallonsu ta uku, amma ba a dauki wani mataki ba. A dukkan wadannan abubuwan da suka faru, an yi tambaya game da rawar da BAR ke takawa a gasar ta bana.
Hukumar kwallon kafa ta FIFA ta fara amfani da na’urar (VAR) a hukumance a shekarar 2018, inda shugaban hukumar Gianni Infantino ya yaba da ita a matsayin wata sabuwar fasaha da za ta taimaka wa alkalan wasa yanke hukuncin da ya dace.
A takaice dai, yin amfani da fasahar bidiyo ne don tallafa wa alkalan wasa a filin wasa a lokacin wani abu ya faru da ba su iya gani a lokacin da ya faru ba, wanda kuma ya kai ga an yi kuskure a yanke hukunci da zai yi tasiri kan wasan. Fasahar ta bai wa alkalan wasa damar yin bitar bidiyo daga kyamarori da dama sannan su yanke hukunci kan ko sun yi kuskure a hukuncin da suka yanke.
Ana amfani da ita a cikin gasa sama da 300 a fadin duniya, a cewar FIFA.
Tawagar alkalan wasa na nazarin bidiyo a dakunan gudanar da ayyukan bidiyo da ke nesa da ainihin filayen wasa – a fagen gasar cin kofin duniya ta 2026, an ajiye su a wata cibiyar yada labarai a birnin Dallas.
Ana iya umurtar alkalan wasa don kallon bidiyon da suka dace akan talabijin na musamman da aka ajiye a gefen filin wasa. Alkalin wasa da ke cikin filin zai yanke hukunci na karshe bayan ya yi wannan bitar.
Kafin gasar 2026, ana iya amfani da na’urar VAR ne kawai a yanayi hudu: cin kwallaye, yanke hukunci kan bugun fenariti, abubuwan da suka faru na jan kati da kuma magance kuskure wurin gane ‘yanwasa.
Na biyar, wanda FIFA ta bayyana a matsayin “bayar da bugun kusurwa bisa kuskure”, an kara shi cikin jerin al’amuran, kuma yanzu ana amfani da VAR don duba idan an bayar da katin gargadi na biyu wanda zai zama jan kati.
BAR ba ta da wani tasiri wajen tantance ko kwallon ta ketare layi ko a’a. Wani tsarin yana duba wannan ta hanyar amfani da na’uran da aka sanya a cikin kwallon don sanar da alkalan wasa kai tsaye ta hanyar agogon da suke sanye da shi a hannunsu.
Yadda ake amfani da ita a gasar bana
Ganin cewa har yanzu gasar ta bana ba ta kare ba, babu cikakkun bayanai. Amma wani bincike da aka yi, ya gano cewa alkalan wasa sun je wurin na’urar sanya ido a filin wasa sau 23 a wasanni da aka buga zuwa yanzu a wannan gasar cin kofin duniya mai tsawo (jimilla wasanni 104).
Shiga tsakani daya ne kawai bai yi sanadiyar sauya hukuncin alkalin wasa na farko ba.
A makon da ya gabata ne Pierluigi Collina, shugaban alkalan wasa na FIFA, ya jaddada muhimman ka’idoji da aka bai wa jami’ansa. Ya ce an gaya wa alkalan wasa su bar cudanya tsakanin ‘yanwasa da bai wuce misali ba, don bari wasanni su gudana cikin sauri.
Gasar cin kofin duniya ta 2026 ta kuma ga karancin bugun tazara da aka bayar a kowane wasa (22.6) idan aka kwatanta da gasa biyu da suka gabata (25 a 2022 da 27 a 2018). Rashin amincewa da cin da Masar ta yi, BAR bai yi daidai ba da yadda ake yin alkalancin wasa a gasar ba zuwa yanzu.
